4º_Lab. de Son: que sabemos de Malpica?

Iniciamos o Laboratorio de Son elaborando, por equipos, os guións para gravar en Radio Balea o primeiro podcast do curso 2021/22. O podcast recolle o guión de cada equipo: A Coruña, Lugo, Ourense e Pontevedra, novos nomes de equipos para novo PDI.

Presentamos o noso MillaInforma: que sabemos de Malpica?, para dar comezo ao Proxecto Documental Integrado que nos ocupará ao longo de dous cursos escolares, centrándonos neste primeiro ano en Malpica e a Costa da Morte.

Premendo na imaxe poderedes acceder as fotos das sesións de gravación.

Deseguido podedes escoitar o noso programa, presentado por Belén para que nos quede a súa voz de recordo cando teña que voltar a universidade. 

Esperamos que vos guste, nós pasámolo xenial!

4º_Aprender a Investigar

 

No presente curso, 4ºEP, contamos no horario semanal cunha sesión adicada a materia de Libre Configuración Aprender a Investigar: saber buscar, organizar, tratar e comunicar a información para transformala en coñecemento. Traballo que non nos é alleo, xa que dende 1º de Primaria é o camiño que percorremos para poder SER, FACER e SABER.

Premendo na imaxe accederedes ao álbum de fotos da materia.

A seguir investigando!

4º_Principiando!

Un ano máis, un curso máis... xunt@s!

Principiamos 4º curso de Educación Primaria con actividades variadas e divertidas, dando comezo ao novo PDI NÓS: patrimonio in-MATERIAL!. Un Proxecto Documental que persegue o coceñemento de nós e do noso, valorando de onde vimos para saber cara onde imos.

Inauguramos o PDI coa visita da AC Raigañas de Cerqueda, comezando o curso ao son da música e o baile tradicional. Na imaxe podedes ver a Belén Veiga, alumna do Practicum II da Facultade de CC da Educación de A Coruña que xa nos acompañou o curso pasado e elexiu dar continuidade as súas prácticas no noso colexio, no noso grupo.

Iniciamos curso e iniciamos novas dinámicas coma Emocibuzón.com, unha caixa do correo onde depositar os nosos escritos en relación coa escola e como nos sentimos integrando emocións e comunicación, así coma a asemblea semanal ou círculo comunicativo para expresarnos e dialogar en gran grupo.

Damos continuidade aos Diver-Ditados e as sesións Hora de Ler, nas que compartir lecturas e enriquecernos xunt@s cos títulos do Plan Lector Anual, realizando Que me contas? ou preparando, por parellas, as lecturas elexidas para a actividade voluntaria Hoxe le...

Premendo no seguinte enlace accederedes ao álbum de imaxes...

4ºEP_Principiando 2021/22

Seguiremos emocionándonos, comunicando, experimentando, creando.

A por un curso moi noso, un curso de todas e todos.

3º_ Resumo das primeiras semanas de curso

Parece que o verán xa queda moi atrás, ainda que por agora o sol nos acompaña no CEIP Milladoiro! As nenas e nenos de 3º levamos un mes habitando a nosa aula, que pouquiño a pouco se vai convertindo nun pequeno fogar e que, como o resto de fogares, precisa unhas normas de convivencia, unas rutinas, horarios, pero tamén recunchiños onde sentirnos cómodas e relaxarnos (como o noso recanto lector!): 

Ademais de traballar algunhas normas básicas de convivencia, ao longo do mes de setembro, a pequena tribu de 3º nos fumos coñecendo e pouco a pouco iniciando a marabillosa aventura de aprender! En Matemáticas estamos descubrindo o valor das diferentes cifras dos números para facilitarnos as vindeiras aprendizaxes (lembrade seguir "cazando" e "destruindo" os números que atopedes no día a día para poñelo en práctica!). Nas linguas fixemos diferentes actividades de avaliación inicial, como o noso primeiro ditado musical ou a lectura e análise das diferentes cartas que a nosa mascota da biblio, Leo, nos envía! 

En Ciencias Sociais estamos iniciando unha investigación relacionada co noso PDI Nós Patrimonio In-material! a través da cal imos coñecer como é a nosa localidade e a súa contorna... pedirémosvos colaboración, familias! En Naturais imos coñecer o funcionamento do noso corpo e, sobre todo, como mantelo san, coidalo e querelo. Como non podía ser doutro xeito, a realidade do volcán de La Palma tamén entrou na nosa aula, convertíndonos en auténticos expertos e expertas deste, reflexionando moito sobre se a natureza é boa ou mala e aprendendo tamén a diferenciar noticias falsas das reais. É incrible a cantidade de información que entre todos e todas xuntaron! No panel lateral do blogue tedes diferentes recursos para seguir aprendendo sobre este tema.    

Por suposto... tivemos xa os nosos primeiros aniversarios! Carlos e Ainoa deron unha nova volta ao sol e fixemos as nosas primeiras ceremonias para desexarlles un feliz ano. 

Proximamente seguiremos contándovos os nosos avances na aula, xa sabedes que está próxima a chegada do Samaín así que lembrade ir buscando unha cabaza xeitosa!

3º_Fin de curso 2020/21

Hoxe finalizamos un curso excepcional no noso colexio, ningún lugar mellor para aprender e soñar xunt@s.

Como actividade final elaboramos o noso libro de produción propia con propostas de actividades para o verán: receita de verán, risa saudable, escribo, ilustro, o meu día favorito, a miña familia, amigos/as, un lugar especial e libros do verán son as páxinas que o conforman.

Ao remate do merecido descanso estival esperamos voltar co noso libro cheo de palabras e ilustracións que resuman o feliz verán que desfrutamos lendo, xogando, compartindo...

Despedimos un curso de moitas emocións, agradecendo á ANPA a merenda fin de curso que nos agasallou, a nosa comunidade polas actividades que nos brindou, as nosas familias e ao noso profesorado polo seu acompañamento, dedicación e coidado diario con todos/as nós.

Feliz e saudable verán a tod@s, voltamos en setembro!

3º_Visita Sr. Alcalde Walter Pardo

 

Hoxe, penúltimo día lectivo do curso 2020/21, recibimos a visita do Sr. Alcalde Walter Pardo para ler e facerlle entrega da nosa instancia (expoñemos-solicitamos) que redactamos como actividade final do lapbook de Ciencias deste último trimestre.

Agradecemos ao Sr. Alcalde que fixera un oco na súa axenda para recoller persoalmente a nosa instancia e escoitarnos; aínda que xa nos aclarou que algúns dos obxectivos que recollemos como Axenda 2022 do Concello de Malpica de Bergantiños xa están en proceso, algúns mesmo cumpridos. Esperamos que todos eles se acaden antes de que finalice o ano 2022.

O vindeiro curso seguiremos aprendendo, contribuíndo á construción dun mundo mellor xunt@s!

3º_Día Mundial dos Océanos: Exposición de Fotografía Subacuática

Hoxe visitamos o Centro Cívico, conmemorando o Día Mundial dos Océanos, coa visita guiada á Exposición de Fotografía Subacuática ofertada polo Concello.

Picando na primeira imaxe accederedes ao álbum de fotos da visita, a cal completaremos o vindeiro venres 11 visualizando un documental medioambiental sobre o mundo mariño.

Aproveitamos o bo tempo, mentras esperabamos a nosa quenda para realizar a visita, desfrutando de xogos populares no noso patio. Picando na imaxe accederedes ao álbum de fotos.

Un día de xogos compartidos e sensibilización para valorar e coidar a vida submarina.

3º_Lab. de Ideas: construíndo un mundo mellor!

Presentamos o vídeo-resumo do Laboratorio de Ideas que complementa o Laboratorio de Son: o mundo escríbese...con X!

Atendendo ao noso PDI Visión 3C en relación coa Axenda 2030 e o Día do Medio Ambiente, que se celebra no día de hoxe, construímos por equipos 4 maquetas/construcións ecolóxicas e creativas.

Pechamos un curso de experiencias compartidas arredor, entre outros, dos laboratorios de aprendizaxe.

O vindeiro curso seguiremos divertíndonos aprendendo!

3º_Lapbook de Ciencias 3º trimestre

 

Rematamos o último lapbook do curso integrando as Ciencias co PDI Visión 3C, coa Axenda 2030 mediante os diferentes laboratorios de aprendizaxe.

Un lapbook co que traballamos por equipos desenvolvendo, entre outras aprendizaxes, a alfabetización en información; creando así as nosas propias lapelas.

A última actividade que realizamos arredor do tratamento do seu contido foi redactar entre tod@s unha instancia (expoñemos-solicitamos) dirixida ao Sr. Alcalde de Malpica cos puntos que consideramos deben ser cumpridos para mellorar a vida da poboación de Malpica e respectar o medio: Axenda 2022 do Concello.

Premendo na imaxe accederedes ao álbum de fotos.

O vindeiro curso seguiremos construíndo!

3º_Sesión formativa con SOGAMA

 

Hoxe o alumnado de 2º e 3º de Primaria asistiron, na nosa Biblioteca, a unha sesión formativa sobre separación de residuos desenvolta por Cristina, persoal de SOGAMA, que xa nos visitou o curso pasado cando participamos no programa de educación ambiental Recíclate con SOGAMA canalizado a través do Plan Proxecta da Consellería de Educación.

Asentaron contidos, xa tratados curricularmente, arredor da necesidade das 3R: Reducir, Reciclar e Reutilizar; e coñeceron unha cuarta R: Recuperación enerxética, aportación que realiza SOGAMA transformando, de forma limpa e respectuosa co medio, a parte non reciclable en enerxía eléctrica.

Premendo na primeira imaxe accederedes ao álbum de fotos da sesión.

Agradecemos ao Concello esta actividade que nos ofertou dentro do seu plan de incorporación ao programa de compostaxe doméstico liderado por SOGAMA.